سئوینجیدیم سورادان دونموشم آها قاداسی

باشیندان آت منه بئل باغلاما داها قاداسی

ایشیقلی دویغولاریم گون به گون کدرلندی

بوروندو طالحیمین آیناسی آها قاداسی

منی اونوت ساری تئللیم ، آما منیم قاپیمی

یادیندا ساخلا آماندیر اونوتماها!! قاداسی

واریم یوخوم بو غزلدیر اودا سنین ،گوروسن؟

دیلنچی هاردا وئرر وار یوخون شاها؟قاداسی

بو دونیا بیزلری بیر قول کیمی اوجوز توتموش

دئمه بازاردا ساتاندا ساتار باها قاداسی

اوزون ووروب قولاق آردینلیقا ائشیتمه یه جک

یالان یئره منی تاپشیرما آللاها قاداسی...

شاعر: مهران عباسیان

وبلاگ ساری غزل

بیریئنی عاشورایی غزل :

فیکرین هایاندادی نه چاتیلمیش قاشین باجی؟

منسیز نئجه بلا چکه جکدیر باشین باجی؟

آغلا یاواش یاواش سو چیله من گئدن یولا

بلکه اوتاندیرا فراتی گوز یاشین باجی

فیکریم سنین یانیندا قالیب نیسگیلیم گلیر

گئتسم ایکی الین اولاجاق بیر باشین باجی

من بوردا اولماسام داریخارسان، بو کوفه نین

مندن سورا یاواشجا آتارسان داشین باجی

باس باغرینا قوجاقلا منی گل حلاللاشاق

گئتسه داها قاییتمایاجاق قارداشین باجی

بو قانلی صفحه ده سنی سورگون چکن زامان

باشسیز چکیبدی قارداشیوی نقاشین باجی...

شاعر :مهران عباسیان